Aktuelli Ibleck i euses Vereinsläbe
Fasnachtswoche 27.02.-05.03.2025
Endlech esches sowiit die lang ersehnti Ziit esch do!
Noch 3 Täg Fäschtufbou semmer voller Vorfreud id Fasnacht gstartet. Eusi Chenderfasnacht am SchmuDo esch scho s erste Highlight gsi, gfolgt vo vellne wiitere.
Mer händ super Uftrett bi toller Stemmig dörfe spele, neui Fäscht entdecke, neui Lüüt könnelehre ond vor allem eifach e gueti Ziit ha metenand.
De Höhepunkt esch secherlech euse "Schrecklech Sonntig" gsi, wo das Johr alässlech vo eusem 55-jöhrige Jubiläum, sogar met Omzog stattgfonde hed!
Bi schönstem Wetter hämer dörfe üse monatelang planti "Schrecklech Sonntig" wonschgmäss dörefüehre.
Danke a alli wo üs onderstötzt händ ond üsi Fasnacht onvergässlech gmacht händ!
Vorfasnacht 04.01.-23.02.2025
Eusi Vorfasnacht das Johr esch bsonders lang gsi ond glich no z chorz för de eint oder ander!
Mer send vell ide Omgäbig onderwägs gsi ond doch heds üs au eis Wocheend is verschneite Wenge verschlage.
S Lauberhornrenne z erlebe ond direkt gägeöber vom Hundschopf dörfe z spele esch secher eis vode Highlights gsi vo dere Vorfasnacht. Wie au euses Wocheend z Schwäbisch-Gmünd am Internationale Guggemusigtreffe.
Probeweekend 07.12.-08.12.2024
Es lehrrichs& gselligs Probeweekend z Truebschache liid hender eus. Noch intensivem Probe semer vo üsem Chochiteam meteme feine Ässe verwöhnt worde.
Aschliessend hämer dörfe es paar gmüetlechi Stonde zäme verbrenge ond üsi neui Bar iweihe.
De Sonntig hämer dörfe meteme feine Zmorge starte demet mer au gstärcht gsi send för de zwoiti Probetag!
Metzgete 05.10.2024
Met de Metzgete hämer dörfe i üses Jubijohr starte! Zäme met de Ehemalige ond sogar Gröndigsmetgleder hämer dörfe de tolli Obe verbrenge. Mer händ s einte oder andere öber vergangeni Ziite dörfe ghöre ond händ natürlech auno es paar Lieder zum Beste gäh. Es grosses Danke a Alli wo debi gsi send.
